Bandera d'Avilés
N'Avilés (Asturies) vienen usándose dos banderes estremaes, anque nenguna de les dos tien rangu oficial.
La primera lleva los colores azul y blancu de la ciudá col escudu nel centru. Ye la qu'anguaño preside tolos actos oficiales nel conceyu, si bien entá nun algamó rangu oficial pesie a que'l so usu ta xeneralizáu.
El so orixe ta venceyáu al del club de fúbol Stadium Avilesino (anguaño Real Avilés). L'equipu local, fundáu en 1903, adoptó como collores del club a entamos de los años 20 los blanquiazules, ello foi por mor de qu'un avilesín, Eusebio Fernández Muñíz, que foi vicepresidente del club barcelonín RCD Español (anguaño Espanyol), xestionó la merca de la ropa cola mesma firma que vestía al club catalán. D'esa mena, el club de fútbol local adoptó l'azul y blancu de la bandera del catalán.
A los pocos años, la bandera futbolística convirtióse nun símbolu de la ciudá. N'ello tuvo abonda influencia la costume de los confiteros d'Avilés de coronar el tradicional mantecáu de les Fiestes de El Bollo, en Pascua, con una banderina de papel blanquiazul. Foi na década de 1950 cuando entamó a escolingáse del balcón de la Casa Conceyu la bandera del equipu avilesín (yá convertíu en Real Avilés). Dende entós, el so usu féxose común y la enseña fubolística algamó l'estatus d'oficiosa.
Al mesmu tiempu, la tradicional enseña avilesina remaneció nel salón d'acoyíes de la Casa Conceyu. Los actos más solemnes n'Aviles foron siempres presidíos pol pendón tradicional, de color granate col escudu la ciudá nel centru, y qu'entá preside el gran salón del Ayuntamientu. Na primer metá del sieglu XX, el pendón colgábase del balcón central de la Casa Conceyu nes fiestes y dellos actos oficiales.
