Austromarxismu

De Uiquipedia
Saltar a: navegación, buscar

Austromarxismu ye un términu emplegáu a partir de 1914 pa falar d'una xeneración de teóricos marxistes austríacos, de los que los sos escritos apaecieron na coleición Marx Studien y la revista Blätter zur Theorie und Politik des wissenschaftlichen Sozialismus. Lloñe de ser un movimientu homoxeneu, formaron parte d'él diferentes políticos y pensadores, como'l neokantianu Max Adler, el nacionalista Otto Bauer y el más ortodoxu Rudolf Hilferding.

Los austromarxistes yeren partidarios de desendolcar una teoría política que s'asitiase ente la socialdemocracia y el leninismu, respetando les diverses maneres de llegar al poder (reforma o revolución) en función de les circunstancies. Con esi espíritu creyaron la Segunda Internacional y Media, aunque los partíos d'esta Internacional posteriormente pasaríen a formar parte de la Internacional Obrera y Socialista.

Adler interesóse na construcción d'una ética política, lo que-yos fixo tornar a mirar pa Kant. La consideración kantiana del home como un fin en sí mesmu entroncaba, dende'l so puntu de vista, cola apuesta marxista pola sociedá comunista.

Pola so parte, Otto Bauer intentó combinar el socialismu col nacionalismu, intentu que se materializó nel so ensayu La cuestión de les nacionalidaes y la socialdemocracia.