Atanasio Corte Zapico

Atanasio Corte Zapico (La Pola Llaviana, 1 de xineru de 1929 - 7 de febreru de 2000) foi un médicu y políticu asturianu.

Cursó'l bachilleratu nel Colexu Loyola d'Uviéu y la carrera de Medicina na Universidá de Madrid y Sicoloxía na Facultá de Filosofía y Lletres. Especializáu en Pediatría nel Hospital Infantil Gourdas de Xinebra.

Miembru del partíu Izquierda Democrática (que lideraba Joaquín Ruiz-Giménez) y cofundador del Atenéu Republicanu, foi senador na primera llexislatura democrática, ente 1977 y 1979.

Nel gobiernu preautonómicu de Rafael Fernández, ocupó'l puestu de Conseyeru de Cultura y Turismu. Nesti cargu destacó, ente otros llabores, pol impulsu que-yos dio a proyectos como los de l'Academia de la Llingua Asturiana, el Muséu de Belles Artes d'Asturies y el Muséu Etnográficu de Grandas de Salime.