Asociación de Naciones del Sureste Asiáticu

De Uiquipedia
Saltar a: navegación, buscar
Los países de l'ASEAN (2014)

L'Asociación de Naciones del Sureste Asiáticu (ASEAN) ye una organización política y económica de países del sureste d'Asia. Foi fundada el 8 d'agostu de 1967 por Indonesia, Malasia, Filipines, Singapur y Tailandia. De magar incorporáonse Brunei, Camboya, Laos, Birmania y Vietnam, lo que fai un total de diez países miembros. Los sos oxetivos inclúin el favorecimientu del crecimientu económicu, el progresu social, l'intercambiu sociocultural ente los sos miembros, la protección de la paz y la estabilidá rexonal y ser un foru pa que los sos miembros resuelvan les sos diferencies pacíficamente[1].

Los miembros que la formen ocupen una estensión de 4,46 millones de km² (el 3% del área total de la Tierra) y una población d'unos 600 millones de persones, el 8,8% del total mundial. El productu internu brutu combináu de los sos miembros yera, en 2012, de 2,3 billones de dólares, de forma que si la ASEAN fora un únicu país sedría la sesta economía mayor del mundu tres de les d'Estaos Xuníos, China, Xapón, India y Alemaña.

Historia[editar | editar la fonte]

Fundación[editar | editar la fonte]

La historia de les organizaciones supranacionales nel sureste asiáticu entama cola formación, en 1961, de l'Asociación d'Asia del Sureste (Association of Southeast Asia, ASA), qu'axuntaba a Filipines, Malasia y Tailandia. La so heriede, l'ASEAN, ñació oficialmente'l 8 d'agostu de 1967, cuando los ministros esteriores de cinco países de la zona aconceyaron na sé del ministeriu tailandés d'asuntos esteriores, en Bangkok, y firmaron la declaración de Bangkok. Estos cinco políticos (Adam Malik d'Indonesia, Narciso Ramos de Filipines, Abdul Razak de Malasia, S. Rajaratnam de Singapur y Thanat Khoman de Tailandia) son consideraos los pas fundadores de l'asociación[2].

La formación de l'asociación respondía a delles motivaciones: el deseyu de les élites gobernantes de los países de la zona de tener un entornu internacional tranquilu que-yos permitiera concentrase na construcción nacional de los sos países, el miéu al comunismu, la falta de confianza nos poderes esternos de la dómina (Estaos Xuníos y la Xunión Soviética) y el deseyu de cooperar p'algamar un mayor crecimientu económicu.

Espansión[editar | editar la fonte]

El primer país non fundador n'incorporase a l'ASEAN foi Brunei que, malpenes una selmana dempués de consiguir la independencia el 1 de xineru de 1984, foi aceptáu (8 de xineru) como sestu miembru del grupu.

El númberu de miembros medró enforma na segunda metá de la década de 1990. El 28 de xunetu de 1995 Vietnam entró na organización, y Laos y Birmania ficieron neto el 23 de xunetu de 1997. Camboya tenía de tener entrao na organización nesa fecha, pero los sos problemes internos impidieron que lo ficiera. Dempués d'estabilizar la so situación política, convirtiose nel décimu miembru de l'ASEAN el 30 d'abril de 1999[3].

Nesa década, amás d'aumentar el númberu de los sos miembros, l'asociación dio pasos hacia una mayor integración. En 1990 Malasia propunxo la creación del East Asia Economic Caucus, una organización qu'había incluyir, amás de los miembros de l'ASEAN, a China, Xapón y Corea del Sur. El oxetivu yera contrapesar la creciente influyencia d'Estaos Xuníos nel Foru de Cooperación Económica Asia-Pacíficu (APEC) y nel continente en xeneral. Magar que la propuesta nun salió alantre pola fuerte oposición d'Estaos Xuníos y Xapón, siguió trabayándose nesa llínia hasta que, en 1997, formose'l grupu nomáu ASEAN plus three, qu'inclúi a los países que diben formar el caucus.

En 1992 firmose un alcuerdu aduaneru cola intención d'aumentar la ventaxa competitiva de la rexón como una base manufacturera orientada al mercáu mundial. Esta llei, nomada Common Effective Preferential Tariff, ñació cola intención de ser el marcu a partir del cual s'avanzara na creación d'un área de llibre comerciu. Tres de la crisis financiera qu'asoló la rexón en 1997 el vieyu proyectu malayu d'una ASEAN ampliada cuayó na nomada iniciativa de Chiang Mai, que pretende una mayor integración de les economíes de los países de l'ASEAN coles trés principales economíes del Asia oriental: China, Xapón y Corea del Sur. Nació asina l'ASEAN Plus Three. Posteriormente creose la nomada East Asia Summit, un fórum qu'inclúi. arriendes d'ellos, a India, Australia, Nueva Zelanda, Estaos Xuníos y Rusia. Como puntu final d'esta apertura a un ámbitu xeográficu mayor, y en vista de la so importancia, l'ASEAN consiguió l'estatus d'observador na Asamblea Xeneral de les Naciones Xuníes.

Amás de los oxetivos económicos el bloque tamién centra la so actividá nel mantenimientu de la paz y la estabilidá de la rexón. Nesti contestu destaca'l tratáu (Southeast Asian Nuclear-Weapon-Free Zone Treaty), firmáu el 15 d'avientu de 1995, que pretende convertir el sureste asiático nuna rexón desnuclearizada. Entró en vigor el 28 de marzu de 1997, magar que nun foi totalmente efectivu hasta'l 21 de xunu de 2001, cuando Filipines lu ratificó.

Espansión futura[editar | editar la fonte]

Timor Oriental unvió una carta solicitando la so incorporación a l'ASEAN a la cumbre de la organización cellebrada en Jakarta en marzu de 2011. L'antiguu alministrador del territoriu, Indonesia, nun punxo pilancos a esi deseyu[4]. D'otra banda, Papúa Nueva Guinea obtuvo l'estatus d'observador especial en 1981 y aspira a integrase na organización pesie a ser, xeográficamente, un país asitiáu en Melanesia.

Referencies[editar | editar la fonte]

  1. La declaración de Bangkok, documentu fundacional de l'ASEAN, na wikisource (n'inglés)
  2. Bernard Eccleston, Michael Dawson y Deborah J. McNamara. The Asia-Pacific Profile. Routledge, 1998. ISBN 0-415-17279-9
  3. Carolyn L. Gates y Mya Than. ASEAN enlargement: impacts and implications. Institute of Southeast Asian Studies, 2001. ISBN 981-230-081-3
  4. East Timor to join ASEAN in Jakarta. Artículu de The Jakarta Globe (1 d'avientu de 2010).
ASEAN
Wikimedia Commons tien archivos rellacionaos con: