Asociación Cultural Faceira

De Wikipedia
Faceira
XUNTA DIRECTIVA
Presidente Nicolás Bartolomé Pérez
DATOS
Fundación 2011
Disolución {{{disolución}}}
Sede Veguellina, Villareyu d'Órbigu (Lleón)
Oxetivos Estudiu, divulgación, proteición y proyeición del patrimoniu cultural, históricu y llingüísticu de Lleón.
Sitiu web http://faceira.org/

Faceira ye una entidá dedicada al estudiu, divulgación, proteición y proyeición del patrimoniu cultural, históricu y llingüísticu de Lleón.

L'asociación garra'l nome de faceira, una pallabra propia del dialeutu occidental del asturllionés que correspuende al estándar facería; en referencia al terrén comunal compartíu polos vecinos d'un mesmu conceyu.[1].

Historia[editar | editar la fonte]

Faceira naz nel añu 2011, cuando dellos antiguos miembros de la desapaecida Facendera pola Llengua decidieron continuar col llabor divulgativu de la llingua y cultura llioneses.[2]

Actividá[editar | editar la fonte]

  • En setiembre de 2011 l'asociación presentó una serie d'escritos y alegaciones énte la Conseyería de Cultura y Turismu de Castiella y Lleón reclamando'l cumplimientu del artículu 5.2 del Estatutu d'Autonomía d'esi territoriu, onde se reconoz al llionés como "oxetu d'especial proteición pol so valor dientro del patrimoniu cultural de la Comunidá Autónoma", amás de reclamar el desarrollu de midíes específiques pa cumplir con esti artículu, como la introducción del asturllionés na enseñanza como asignatura optativa. Énte la negativa de la Xunta de Castiella y Lleón (que contestó con una carta ensin dar respuesta al pidimientu fechu) l'asociación punxo una demanda a la Xunta de Castiella y Lleón por violar l'artículu 29 de la Constitución Española, que sigue nel Xulgáu del Contenciosu Alministrativu númberu 1 de Valladolid.[3]
  • Nel añu 2013, participó -xunto con otres cuatro asociaciones de Lleón, Zamora y Salamanca- na redaición y unviu d'un escritu a les Cortes de Castiella y Lleón reclamando la proteición y enseñu del llionés.[4].
  • Faceira ta implicada na defensa de la figura de los conceyos abiertos (tamién llamaos xuntes vecinales) tres la reforma de la Llei d'Alministración Llocal entamada pol gobiernu español que les fai apeligrar. Por esta razón, l'asociación axúntase con estremaes asociaciones y agrupaciones polítiques[5] na salvaguarda d'esta institución municipal. Amás vien d'organizar xornaes y alcuentros pa trabayar en favor de la so dignificación. D'esta manera, n'ochobre de 2012 emprincipió un proyeutu de documental audiovisual llamáu "La voz del concejo" xunto con Laboratorio Bambara col oxetivu d'abordar la figura histórica de los conceyos.[6].
  • L'asociación suel collaborar con distintes asociaciones llocales, como ye'l casu de Raigañu, na organización de filandones[7].
  • Nel 2013, entamó col conceyu d'Estorga'l I Certame lliterariu Astúrica pa escritores n'asturllionés.
  • Nos caberos años vien de tomar contactos con distintos grupos políticos y sociales. D'estos derivó nuna campaña en defensa del llionés per parte del comité d'Izquierda Xunida n'Estorga en 2014 y que dellos procuradores d'esta agrupación nes Cortes de Castiella y Lleón presentaren unes entrugues sobre la situación del idioma y del cumplimientu del artículu 5.2 del Estatutu.[8][9]

Creación d'un subestándar[editar | editar la fonte]

En 2012 el coleutivu iguó, cola collaboracióon del académicu Héctor García Gil, una propuesta de subpadrón llingüísticu supradialeutal pal bloque occidental del asturianu, especialmente pa les modalidaes falaes en Lleón. La so pretensión nun yera la ruptura col restu del asturllionés, sinón adecuar una norma a la realidá socio-llinguïstica de les fales llioneses, polo que toma como referencia la normativa ortográfica de l'ALLA.

Esti fechu materializóse cola publicación de la Guía gramatical Xurdir,[10] un pequeñu manual práuticu en castellanu sobre cuestiones gramaticales básiques del llionés ideáu p'aquellos quieran aniciase nel so estudiu. La obra consta de 18 capítulos y abarca dende cuestiones de fonética y ortografía a la morfosintaxis. La base llingüística fundamental, anque non esclusiva, de la obra contitúinla'l cabreirés y el paḷḷuezu.

Asina, Faceira pondría más tarde en disposición un cursu on-line basáu nel manual[11].

Ver tamién[editar | editar la fonte]

Enllaces esternos[editar | editar la fonte]

Páxina web de l'Asociación Faceira

Referencies[editar | editar la fonte]