Artes lliberales
El conceutu d'arte lliberal, heredáu de la antigüedá clásica, fai referencia al so cultivu por "homes libres" n'oposición a les "artes serviles". El términu artes lliberales (en llatín artes liberales) designaba los estudios que teníen como propósitu ufrir conocencies xenerales y destreces inteleutuales enantes que destreces profesionales o ocupacionales especializaes.
Les siete artes lliberales que s'enseñaben na antigüedá comprendíen dos conxuntos d'estudios: el trivium y el quadrivium. Yeren éstes (acompañaes de la so materia principal en llatín):
- la gramática, lingua "la llingua";
- la dialéutica, tropus "les figures";
- la retórica, ratio "la razón";
- la aritmética, numerus "los númberos";
- la xeometría, angulus "los ángulos";
- la astronomía, astra "los astros";
- la música, tonus "los cantos".
Mientres la Edá Media, les artes lliberales conformaben la parte central del currículu de les universidaes. Alcuinu, conseyeru inteleutual de Carlomagnu, adautóles como bas de la reforma escolar llevada a términu mientres el periodu del Renacimientu carolinxiu. Nes teoríes educatives medievales el quadrivium seguía'l trabayu preparatoriu del trivium. Anque l'esquema de trivium y quadrivium conócese dacuando como "educación clásica", correspuéndese fundamentalmente con un desendolcamientu medieval qu'aporta a los sieglos XII y XIII.
L'ámbitu y algame de les artes lliberales evolucionó nel tiempu. Inicialmente referíase a la educación de les élites nos clásicos. Boeciu, el "caberu romanu, el primer escolásticu", nún intentu casi desesperáu de tresmitir a los nuevos dueños d'Italia la civilización clásica, permanez nel reinu de los ostrogodos pa intentar enseña-yos los rudimentos del quadrivium. Del sieglu VI n'alantre, el sistema medieval d'estudios académicos corresponderase col esquema doble de los conteníos del trivium y quadrivium magar que cola apaición de les Humanidaes y de la Ciencia na época de la Ilustración, el significáu de "artes lliberales" estiéndese hasta abarcar dambes. Aínda escluyénse de les artes lliberales ocupaciones específiques como l'agricultura, los negocios, la inxeniería, la pedagoxía, la medicina o la farmacia.
Na Edá Contemporánea, el conceutu, utilizáu más bayurosamente como profesiones lliberales comprende l'exerciciu profesional que requier formación universitaria, fundamentalmente'l Derechu y la Medicina.
Índiz |
El trivium [editar]
El trivium, (lat. "tres víes o caminos") agrupaba les disciplines lliteraries (rellacionaes cola elocuencia). La máxima llatina Gram. loquitur, Dia. vera docet, Rhet. verba colorat resume los conteníos y enseñances de cauna d'elles:
- Gramática, la ciencia del usu correutu de la llingua, ayuda a falar;
- Dialéutica, la ciencia del pensamientu correutu, ayuda a buscar la verdá;
- Retórica, la ciencia de la espresión, enseña a "colorear" les pallabres;
El quadrivium [editar]
El quadrivium (lat. "cuatro caminos"), agrupaba les disciplines científiques rellacionaes coles matemátiques. La máxima llatina rezaba Ar. numerat, Geo ponderat, As. colit astra Mus. canit. Yeren éstes:
- aritmética, enseña a facer númberos;
- xeometría, enseña a calcular;
- astronomía, enseña a cultivar l'estudiu del los astros;
- música, enseña a producir notes.
Referencies bibliográfiques [editar]
Charles Blaich, Anne Bost, Ed Chan, e Richard Lynch (2004) Defining Liberal Arts Education. Center of Inquiry in the Liberal Arts.
Ricardo da Costa. "Las definiciones de las siete artes liberales y mecánicas en la obra de Ramon Llull", Revista Anales del Seminario de Historia de la Filosofía. Madrid: Publicaciones Universidad Complutense de Madrid (UCM), vol. 23 (2006), p. 131-164 (ISSN 0211-2337)- Sister Miriam Joseph (2002) The Triviuum: The Liberal Arts of Logic, Grammar, and Rhetoric. Paul Dry Books.
- Brand Blanshard (1973) The Uses of a Liberal Education: And Other Talks to Students. Open Court.
