Antonio Remis Álvarez

De Wikipedia
Antonio Remis Álvarez
Vida
Nacimientu Madrid10 d'agostu de 1900
Nacionalidá España
Muerte Madrid5 de xineru de 1989 (88 años)
Estudios
Llingües falaes castellanu
Oficiu políticu
Cambiar los datos en Wikidata

Antonio Remis Álvarez (10 d'agostu de 1900Madrid – 5 de xineru de 1989Madrid) foi un periodista y políticu republicanu español.

L'entamu[editar | editar la fonte]

Antonio Remis Álvarez yera fíu de los asturianos Marcelino Remis Pérez y de Florentina Álvarez Villoria. Anque nacíu en Madrid, siempre se sintió mui asturianu quiciabes porque de críu vivió n'Avín, nel conceyu d'Onís: "onde mi salieron los dientes". Estos años n'Avín en casa de Celestina, hermana de so madre, y de Manuel Quesada Fernández, recordarálos tola so vida. Ellí dedicóse a lo que facíen tolos repaces de la so edá: curiar la reciella y ayudar nos llabores del campu. Remis conocía tolos nomes y requexos de la rodiada y del Puertu Baxu y la so prodixosa memoria permitió-y recordalos tola vida. Remis perteneció dende setiembre de 1920 al cuerpu d'oficiales de Correos, aquel que proclamó la Segunda República Española nel Palaciu de Comunicaciones de Madrid el 14 d'abril de 1931. Nel añu 1930 yera vocal del Centru Asturianu de Madrid y el so hermanu Marcelino direutor d'estudios[1]. Nes eleiciones de 1931 pa la xunta direutiva del Centru, saldrá elixíu secretariu xeneral[2].

La política[editar | editar la fonte]

Taba afiliáu a la UXT y al Partido Republicano Radical Socialista Independiente, de Marcelino Domingo y Álvaro de Albornoz, qu'en 1934 formaría, en xuntanza con otros, Izquierda Republicana. D'esti caberu fue presidente de la Xunta Municipal de Madrid nel periodu de la Guerra Civil[3]. Hacia xunu de 1937 ta allistáu na Brigada Mixta númberu 75, na que yera mayoritaria Izquierda Republicana. En mayu de 1938 fue nomáu gobernador civil de Córdoba[4], cargu qu'ocupó hasta'l final de la guerra en Villanueva de Córdoba[5], por tar ocupada la capital polos franquistes. Anque taba lloñe, siguió participando nos alderiques d'Izquierda Republicana en Madrid, como miembru que yera del Conseyu Nacional[6]. Remis paez ser que, nun principiu, fue roceanu al golpe de Casado pero acabó acatándolu, por ser los socialistes contrarios a Negrín mayoritarios na Córdoba republicana[7]. De toes formes, Izquierda Republicana fue favoratible al golpe y participó con dos representantes nel "Consejo Nacional de Defensa" instauráu por Segismundo Casado a primeros de marzu de 1939. El 26 d'esi mes, al rompese'l frente de Córdoba, Remis cesa nel cargu de gobernador y marcha pa Madrid[8].

Les cárceles[editar | editar la fonte]

Remis refuga l'exiliu asumiendo'l riesgu que cuerre la so vida al haber ocupáu un altu cargu nel gobiernu de la República. El 31 de marzu detiénlu la policía d'ocupación ingresando na cárcel de Torrijos de Madrid onde permaneció presu más de dos años hasta que lu treslladen a la vecina prisión de Porlier en xunu de 1941. D'equí sal en setiembre de 1943 camín de la prisión provincial de Córdoba pa ser xulgáu el 29 de xunetu de 1944 nun conseyu de guerra acusáu de rebelión. El tribunal condenólu a reclusión perpétua. Les siguentes noticies que tenemos d'elli son cuando pide l'indultu, dende l'Hospital Penitenciariu-Prisión Escuela de Madrid, nel mes de payares de 1945. Asina fue que, por mor d'un decretu qu'idultaba presos que nun hubieren cometíu “hechos que por su índole repugnen a todo hombre honrado, cualquiera que fuere su ideología”[9]. Remis recupera la llibertá el día de Nueche Bona de 1945. De siguíu, incorpórase a la direición d'Izquierda Republicana nel interior y a la llucha clandestina. Con identidá falsa percorre en tren tola península pa evaluar la situación de les fuercies republicanes que tovía lluchaben clandestinamente escontra la dictadura. Tamién fue corresponsal, col alcuñu de Walter Spain, d'El Pueblo, que daquella yera'l portavoz nel esterior del Conseyu Nacional d'Izquierda Republicana[10]. Pero seis meses depués, en mayu de 1946, detiénenlu otra vegada al rellacionalu coles actividades clandestines de l'Alianza Nacional de Fuercies Democrátiques[11]. Nun son quien a probar la so culpabilidá y sal en llibertá provisional finando'l mes de mayu. La siguente noticia de so ye una nueva detención n'abril de 1947[12] nel marcu de les encaminaes a baltiar les movilizaciones de los republicanos escontra la Llei de Socesión, que se conoció a primeros d'abril.

L'exiliu[editar | editar la fonte]

Como yera vezu, a los deteníos llevábenlos a les dependencies de la Direición Xeneral de Seguridá de la Puerta'l Sol pa ser interrogaos y torturaos; dempués d'una d'eses sesiones Remis espierta nun despachu vacíu y aprovecha pa fugase. Según el so testimoniu, vistió una gabardina y un sombreru que colingaben d'una percha y salió pela puerta ensin que naide-y entrugara daqué[13]. La so única opción yera cruzar la frontera francesa y exiliase nel país vecín. Llegará a París finando'l mes de mayu[14] ocupándose ensiguida a llabores rellacionaos cola prensa; en setiembre ye nomáu Secretariu Xeneral del Ministeriu de Gobernación[15] encamentándo-y el gobiernu d'Álvaro d'Albornoz la coordinación de la llucha escontra Franco nel interior d'España. A ello améstanse collaboraciones y artículos d'opinión en Política y El Pueblo y el so trabayu de traductor de la UNESCO. En 1948 opónse con enfotu a les conversaciones ente Indalecio Prieto y Gil Robles, que representa a Xuan de Borbón, pa echar a Franco nel llamáu pactu de Saint-Jean-de-Luz porque dexaben de llau a los republicanos[16]. En febreru de 1950 interrumpese cuasi un añu la edición de Política pero Remis siguirá publicando artículos nel periódicu hermanu Izquierda Republicana de Méxicu. En xineru de 1951 apaez de nuevu Política, financiada por elli[17]. Remis plantega'l proyéutu como un llugar pal alderique republicanu y el so espardimientu nel exiliu y n'España, a onde mandaben abondos exemplares. Hasta'l diariu ABC s'ocupó nun editorial d'ello[18]. El periódicu, del que fuera direutor ente otros Ángel Galarza, cuntaba con una Asociación de Amigos de Política y una Liga Republicana-Socialista de Estudio, Propaganda y Aición. Cuando taba a piques de constituise, l'Asociación de Amigos dicía[19] que'l proyeutu:

“...es el resultado de la fe de un hombre en la República. Abrumado por las amarguras de las persecuciones, qu'él y otros sufrieron n'España en la post-guerra, llegó a Francia cola esperanza que creaba su liberación y la creencia de que el exilio era un constante y ardiente trabajo en pro de la liberación d'España. Este republicano, cuyo nombre no estampamos porque es de todos conocido y su modestia rehuye la publicidad, pensaba en la actuación de las Instituciones republicanas, en la actividad febril de los partidos políticos españoles. Su decepción fue inmensa. Sus sueños no eran la riqueza, ni el automóvil, ni el frigidaire, ni la televisión. Era la República, seguir sirviéndola. Contando con sus exclusivos ingresos “refundó” Política. Fue su trinchera, y ondeó una bandera: la de la lucha”.

Esi republicanu será'l que caltenga la publicación hasta los años ochenta. Esti periódicu criticará no socesivo cuasi tolos gobiernos de la República nel exiliu pola so pasividá na llucha por derrocar a Franco. Esta inaición quiciabes seya'l bierzu de la creación en 1954, por un garapiellu de xente al rodiu del periódicu, del Movimiento Republicano Antifascista de Liberación Hispana (MRALH) del que Remis yera vicepresidente. Ante la inoperancia y acomodamientu de los gobiernos de la República nel exiliu, Antonio posiciónase nuna fastera más a la manzorga y más activa que la mantenía hasta esi momentu. Frutu d'ello foi l'averamientu a Álvarez del Vayo y l'intentu d'aconceyar nel MRALH a tolos republicanos que pensaben nesi sen. Nesti ambiente de crítica, Antonio Remis y Claudio Sánchez-Albornoz, presidente del gobiernu, mantienen una comunicación epistolar sobre la formación del nuevu gobiernu en 1962[20] na que Remis encamentába-y a Sánchez-Albornoz que desendolcara un ampliu programa d'aición, porque n'aición taba'l triunfu y si nun yera quien que dimitiera. En 1976 Remis presidió la Convención Republicana de los Pueblos de España celebrada en París y en declaraciones a El País[21] dicía: “Somos hombres de gobierno”. Yá nos años ochenta col desencantu y la traición al proyéutu republicanu del PSOE y del PCE, Remis abellugóse nel caltenimientu de Política hasta que les fuercies se-y escosaron. Morrió en 1989 en Madrid, entamando xineru.

Referencies[editar | editar la fonte]

  1. 1. Revista Norte, xunu 1930.
  2. 2. González Suárez, E. (2000). Centro de Asturianos de Madrid, p. 530.
  3. 3. La Vanguardia, 25 de mayu de 1937, p. 8.[1]
  4. 4. Gaceta de la República, n. 148 de 28 de mayu de 1938.[2]
  5. 5. La Vanguardia, 22 de payares de 1938, páx. 5.[3]
  6. 6. Política, setiembre 1951, p. 3 y 4.
  7. 7. Moreno Gómez, F. (1986, 2ª ed.) La Guerra Civil en Córdoba (1936-1939), p. 685.
  8. 8. Ponce Alberca, Julio (coord.) (2008) Guerra, Franquismo y Transición. Los gobernadores civiles n'Andalucía (1936-1979), p. 52 [4]
  9. 9. Decretu de 9 d'ochobre de 1945, BOE nº 293 de 20 d'ochobre, páxs. 2430-2431. [5]
  10. 10. El pueblo, n. 17, p. 2. París, 23 de xunu de 1947.
  11. 11. España Nueva, n. 28, p. 12. Méxicu, 1 de xunu de 1946.
  12. 12. Izquierda Republicana, n. 28, páxs. 1 y 7. Méxicu, 15 d'abril de 1947.
  13. 13. Herrero, Isabelo: Izquierda Republicana en la clandestinidad. Una historia por escribir, en Ángeles Egido León y Matilde Eiroa San Francisco (ed., 2004) Los grandes olvidados, p. 450.
  14. 14. Política, n. 25, p. 4. París, 31 de mayu de 1947.
  15. 15. Gaceta Oficial de la República Española, n. 19, p. 91. París 20 de setiembre de 1947.
  16. 16. Izquierda Republicana, n. 41, p. 2. Méxicu DF 10 d'agostu de 1948.
  17. 17. Política, xineru-febreru, p. 1. París, 1953.
  18. 18. [[ABC (periódicu)|]], p. 28, 4 de febreru de 1965. Editorial. Una triste propaganda[6].
  19. 19. Política, n. 3, p. 3. [París], setiembre 1963.
  20. 20. Alted Vigil, Alicia (1991) Gobierno y partidos republicanos españoles en el exilio (1950-1962). En Mélanges de la Casa de Velázquez, t. 27-3.
  21. 21. El País, 3 de xunu. Madrid 1976. [7]

Enllaces esternos[editar | editar la fonte]