Andecha
L'Andecha ye una institución del Derechu consuetudinariu Asturianu.
Carauterístiques[editar | editar la fonte]
El términu andecha deriva del vocablu indicta participiu del llatín indicere (anunciar) –"llamar a andecha"- y consiste nun trabayu personal, voluntariu y de baldre que s'axusta al esquema de la reciprocidá equilibrada: "Güei por ti, mañana por mí". L'andecha inscríbese poro dientro de los trabayos que'l drechu llaboral denoma amistosos, bonables y bona vecindá.
La mano d'obra de l'andecha ye recoyida acordies colos llazos familiares, d'amistanza o vecindá, pa facer frente a los trabayos de cotanes del ciclu agrícola que resulten más urxentes y a aquellos llabores que son costosos sobre manera pa les families del pueblu que treviesen circunstancies especiales como viudedá, malura o situaciones asemeyaes. L'andecha tamién se convoca p'aidar nel acarretu de materiales na construcción o igua d'un edificiu.
Participantes[editar | editar la fonte]
En tou caso los participantes na andecha, pola mor del so calter voluntariu y de baldre, nun puen adquirir derechos de propiedá sobre'l productu del trabayu en comuña, singularidá que constitúi'l rasgu xuridificador d'esta figura.