Ana Cano
Ana María Cano González (Villarín, Somiedu, 12 de mayu de 1950) ye una filóloga asturiana. La so vida académica ta venceyada a la Universidá d'Uviéu: n'ella llicénciase en Filosofía y Lletres con premiu extraordinariu en 1972 y doctórase tres años mas tarde cola so tesis El habla de Somiedo, calificada con sobresaliente cum laude. Güei ye catedrática de Filoloxía Románica y foi Decana de la Facultá de Filoloxía de la mesma Universidá hasta l'añu 2008, cuando dimitió por mor de la Crisis de la Facultá de Filoloxía, tres que la Xunta de Gobiernu votara a la escontra d'un maior de llingua asturiana dientro de los nuevos estudios reglaos adecuaos al nuevu espaciu européu.
Dende 2001 preside l'Academia de la Llingua Asturiana, cargu pal que foi escoyida dempués de la marcha de Xosé Lluis García Arias, tres venti años como presidente de la principal institución llingüística n'Asturies.
El llabor d'Ana Cano ta reconocíu nel ámbitu européu y tien escritos artículos filolóxicos en bien de publicaciones de prestixu. Ye autora del Vocabulario del bable de Somiedo, tesis que foi espublizada pol Institutu d'Estudios Asturianos nel añu 1982.
| Predecesor: Xosé Lluis García Arias |
Presidenta de l'Academia de la Llingua Asturiana 2001 - Anguaño |
Socesor: Nel cargu |
