Ambrós

De Uiquipedia
Saltar a: navegación, buscar

Miguel Ambrosio Zaragoza (Albuixech, Valencia, 31 d'agostu de 1913 - 30 de setiembre de 1992), conocíu dientro del mundu del cómic como Ambrós, foi un dibuxante y guionista d'historietes conocíu sobre panera por ser el dibuxante de les aventures d'El Capitán Trueno.

Biografía[editar | editar la fonte]

Estudió Maxisteriu y exerció como maestru hasta'l final de la guerra civil española; entós, por razones polítiques, prefirió dexar la docencia y ayudar nos trabayos del campu a so padre y a so madre. En 1946 presentóse ante Juan Puerto, fundador d'Editorial Valenciana, con un tebeo de El Guerrero del Antifaz fechu por él, lo que-y valió pa facer delles historietes humorístiques pa la editorial. Esi mesmu añu treslladóse a Barcelona, onde entamó a facer dellos tebeos pa pequeñes editoriales, como los cuadernos d'aventures Dos yanquis en África, pa Bergis Mundial, o delles páxines pal selmanariu Chispa. El so primer trabayu importante consistió en dibuxar la serie El Caballero Fantasma , del guionista Federico Amorós. El personaxe taba inspiráu en El Zorro y publicábalu la editorial Grafidea.

El Caballero Fantasma algamó una sonadía considerable. Otra editora de tebeos, Saturno, qu'asoleyaba les aventures d'un personaxe de nome idénticu, interpuso una demanda, lo qu'obligó a Federico Amorós a "matar" al mocín, que foi sustituyíu pol so discípulu, El Jinete Fantasma. Lloñe de perxudicar a la serie, el cambéu fizo medrar inesperadamente les ventes. En 1951 dejó d'editase la serie, de la que llegaron a asoleyase 146 números, pero Ambrós continuó dibuxando una nueva serie de aventuras, Chispita, nel que'l mocín yera'l fíu del Jinete Fantasma.

Gracies a la sonadía algamada por El Jinete Fantasma, Ambrós foi contratáu por Bruguera, pa la qu'entamó dibuxando'l suplementu d'aventures de Pulgarcito, cola serie La nave del tiempo, de la que s'asoleyaron 10 cuadernos. Tamién trabayó como ilustrador de dellos llibros de Bruguera, como Los tres mosqueteros.

En 1956 Ambrós recibió l'encargu de crear la imaxen de El Capitán Trueno a partir de la sinopsis del guionista Víctor Mora. A partir de xunu d'esi añu dibuxó al personxe, tanto nel cuadernín d'aventures quincenal como nes sos apariciones na revista Pulgarcito. A partir del nu 22 el cuadernín, por mor del ésitu de la serie, pasó a tener periodicidá selmanal, lo que imponía a Ambrós un ritmo de trabayu frenéticu. Hasta'l númberu 35 Ambrós ilustró la serie en solitario, pero nel siguiente contó cola ayuda d'un entintador, Beaumont, que collaboró nos númberos 36, 38-45, 47-168 y 173-175. Nes páxines de Pulgarcito El Capitán Trueno publicábase nes páxines centrales, xunto a otres series d'aventures, como El inspector Dan de la patrulla volante, de Eugenio Giner o El capitán Vendaval, de Tony Bernal.

El Capitán Trueno algamó un ésitu ensin precedentes na historia de la historieta española, llegando a tener una tirada de 350.000 exemplares por episodiu. Magar d'ello, esti ésitu tenía una menguada repercusión económica nel so dibuxante, que, fartu de les imposiciones de la editorial, decidió abandonar la serie depués del númberu 175. En 1960 treslladóse a París pa tratar d'impulsar la so carrera como pintor, pero la so escasa fortuna fizo que regresara a España en 1964 y tornase a trabayar pa Bruguera. Anque al entamu nun quixo continuar dibuxando El Capitán Trueno, y dedicóse a realizar episodios de Rintintín y Tarzán y a ilustrar noveles de la editorial, en setiembre d'esi mesmu añu terminó por regresar al personaxe, magar que sólo publicó tres aventures en Trueno Extra, revista selmanal qu'apaeciera en 1960.

En 1965 dexó Bruguera y entamó a trabayar pa Editorial Valenciana, na que fizo delles historietes hasta 1971. L'añu anterior regresara a Bruguera pa dar vida a otru personaxe del guionista Víctor Mora, El Corsario de Hierro, qu'entamó a publicase na revista Mortadelo.

En 1981 Ambrós retiróse del mundu del cómic, al que yá nun regresaría más, con una sola escepción: la historia de El Capitán Trueno que dibuxó espresamente pa la Historia de los Cómics (1983) de la editorial Toutain.

En 1989 recibió'l Gran Premiu del Salón del Cómic de Barcelona pol ensamu de la so obra. La historia d'El Capitán Trueno -y la del cómic español- sedría bien distinta ensin los dibuxos d'Ambrós.

El so estilu yera realista con un trazu sele y espresivu.