Altu'l fueu
Un altu'l fueu (tamién conocíu como cese'l fueu) ye la detención temporal d'una guerra, o de cualesquier conflictu armáu, na que los bandos engarraos alcuerden, mutua o unillateralmente, el cese de les hostilidaes. L'altu'l fueu o la tregua pueden declarase como parte d'un tratáu de paz formal, pero tamién puen ser la demostración d'una voluntá d'entendimientu ente les partes engarraes previa a la paz definitiva.
Exemplos d'altu'l fueu[editar | editar la fonte]
El 29 d'avientu de 1914, mientres la Primer Guerra Mundial, na denomada Tregua de Navidá, hubo un altu'l fueu transitoriu, non oficial, ente alemanes y británicos, ensin qu'hubiera nengún tratáu robláu. La Guerra retomóse al cabu d'unos díes.
Un exemplu más recién d'altu'l fueu foi l'anunciáu ente Israel y l'Autoridá Nacional Palestina'l 8 de febreru de 2005. Nel momentu del anunciu, el xefe negociador palestín, Saeb Erakat, definió l'altu'l fueu de la manera siguiente: «Alcordemos que, güei, el presidente Abbas va declarar un cese completu de la violencia contra los israelinos perdayuri y que'l primer ministru Ariel Sharón va declarar un cese completu de la violencia y les actividaes militares contra los palestinos perdayuri».
Otru exemplu más recién inda, nesti casu d'un altu'l fueu unillateral, tuvo llugar el 22 de marzu de 2006, nel que la organización terrorista Euskadi ta Askatasuna (ETA) declaraba un altu'l fueu permanente nes sos hostilidaes escontra los gobiernos español y francés. Según el comunicáu d'ETA, «l'oxetivu d'esta decisión ye impulsar un procesu democráticu n'Euskal Herria pa construyir un nuevu marcu nel que seyan reconocíos los derechos que como pueblu nos correspuenden» de forma que se «supere'l conflictu de llargos años y que se construya una paz basada na xusticia». Esta tregua terminó col atentáu na terminal T-4 del Aeropuertu de Madrid-Barajas el 30 d'avientu de 2006, onde morrieron dos persones ecuatorianes, y finalmente con un comunicáu d'ETA la 5 de xunu de 2007. El 5 de setiembre de 2010, ETA «anunció'l cese de les aiciones armaes ofensives»; y en xineru de 2011, ETA declaró que l'altu al fueu yera «permanente, xeneral y verificable».
Referencies[editar | editar la fonte]
- World War I Christmas Truce by Thousands of German Soldiers, Tregua de Navidá mientres la Primer Guerra Mundial de los soldaos alemanes, n'inglés.
- Sharon and Abbas set to declare ceasefire at Mideast summit, AFP News Wire, 2/8/05, Sharon y Abbas declaren l'altu'l fueu, n'inglés.