Alfons Mucha

De Uiquipedia
Saltar a: navegación, buscar
Alphonse Mucha

Alfons Maria Mucha (24 de xunetu de 186014 de xunetu de 1939) ye un pintor y cartelista checu, unu de los máximos esponentes del Art nouveau.

Los entamos[editar | editar la fonte]

Alfons Mucha nació n'Ivancice en Moravia (República Checa), que formaba parte entós del Imperiu austro-húngaru). Fíu d'un funcionariu de xusticia, la so aptitú pal cantu permitiéron-y continuar la so educación na capital morava, Brno, pero la so pasión fuera siempre'l dibuxu. Depués de realizar dellos trabayos decorativos en Moravia (fundamentalmente los decoraos del teatru), emigra en 1879 a Viena cola intención de trabayar pa la más grande empresa de decoraos teatrales de la ciudá, continuando la so formación artística. Torna a Moravia en 1881, depués de qu'una quema destruyera la so empresa y realiza decoraciones y retratos de forma independiente. El Conde Karl Khuen de Mikulov, que lu contratara pa decorar les parés del so castiellu Hrusovany Emmahof, quedó tan impresionáu col so trabayu que-y financia los estudios en Munich.

L'actriz Maude Adams caracterizada como Xuana d'Arcu

París[editar | editar la fonte]

Mucha mudóse a París en 1887 pa continuar colos sos estudios na académie Julian y na Académie Colarossi, produciendo al mesmu tiempu ilustraciones pa revistes y afiches publicitarios. N'avientu de 1894 realiza'l cartel publicitariu de Gismonda, la obra interpretada por Sarah Bernhardt nel Théâtre de la Renaissance. Esi cartel asoleyóse los primeros díes de xineru de 1895 y causó una sensación grande nos ambientes artísticos, lo que fizo que Sarah Bernhardt lu contratara n'esclusiva durante seis años. El so estilu finu valió-y muncha notiriedá. Los carteles realizaos pa ella contribuyeron a esparder la fama de l'actriz más allá de les fronteres de Francia. Hasta 1901, Mucha non solo foi responsable de los carteles publicitarios, sinon tamién de les escenografíes y los vestuarios del Théâtre de la Renaissance. Foi esta obra, col so estilu exuberante y estilizáu, lo que-y dio tanto sonadía como numberoses comisiones.

Otros carteles famosos pal Théâtre de la Renaissance son:

  • La Dame aux camélias( 1896)
  • Lorenzaccio (1899)
  • La Samaritaine (1897)
  • Médée (1898)
  • Hamlet (1899)
  • Tosca (1899)¨

En 1896, participa na Exposition du Cirque de Reims y fai'l cartel del Salon des Cent que tien llugar en París.

Mucha ye tamién conocíu por facer una riestra de pintures, posters y carteles publicitarios pertenecientes al estilu Art nouveau. Ente ellos, los más populares, podemos citar Lefèvre-Utile, Job, Perfecta, Ruinart, Moët et Chandon.

Representaba normalmente muyeres xóvenes con vestíos neoclásicos con teles flotantes, a menudo coronaes con flores. El so estilu foi aína asonsañáu, pero ensin algamar el toque artísticu que solo Mucha podía dar.

Cuando Mucha visitó Estaos Xuníos foi reclutáu pola excéntrica actriz Leslie Carter, que trató de superar la ostentación de les obres de teatru de Sarah Bernhardt, lo que finalmente la llevó a la ruina. El formatu y la configuración de los carteles yeren asemeyaos a los fechos pal Théâtre de la Renaissance antes de 1900, con una influencia de les xoyes creaes pa Georges Fouquet.

Muerre en Praga el 14 de xunetu de 1939, dellos díes depués de ser interrogáu pola Gestapo. El so cuerpu foi tiráu a una fuexa común, la iglesia católica refugó da-y sepultura en tierra cristiana debido al fechu de la so pertenencia a la masonería. Una placa conmemorativa ta dedicada a él nel cementeriu de los Grandes Homes de Praga.