Alderique:Ursus arctos

¡Hola! Quería dicir que nun toi d'alcuerdu en que'l nome de los artículos referíos a animales o vexetales tean de nomase col nome científicu. Nun sé si hai una norma nesta wikipedia sobro esto, ye dicir, si hai que facelo asina (intenté buscala, non muncho la verdá, pero nun vi nada). Si nun hai nada dicho, cuido que lo meyor sedría facer una votación pa determinar cuála ha ser la forma pa denomar estos artículos, si col nome común de la llingua (y faciendo una redireición dende'l nome científicu) o col nome científicu (cola redireición dende'l nome común n'asturianu). Mirando n'otres wikipedies, la gran mayoría d'elles usen el nome común na llingua respeutiva, y non el científicu (que solo usen les wikipedies n'español, n'aragonés y n'italianu) -consultélu dende los artículos enllaciaos a esti del osu pardu, mirando les llingües qu'usen alfabetu llatín.--Etienfr 17:48, 17 setiembre 2011 (UTC)

Bones Eienfr, va unos años tuvimos un alderique al rodiu d'esti tema, hebo una votación y tomose una decisión al repective que pues consultar en "Convenciones de nomenclatura" (http://ast.wikipedia.org/wiki/Uiquipedia:Convenciones_de_nomenclatura). El principal problema col que mos alcontramos al poner el nome común de les especies, ye que nun siempre había denomaciones específiques pa les subespecies -munches veces l'asturianu emplega'l mesmu nome pa diferentes subespecies- o pa especies qu'escapaben del nuesu ámbitu natural más cercanu (como les especies exótiques) y ésto provocaba confusión. La principal ventaya, arriendes d'esto, yera que'l términu llatinu ufría tecnicidá. Con too ello, si sigues tando en desalcuerdu pues plantegalo de vuelta nel "Chigre" y solicitar una segunda votación. Saludos.--Denis 22:24, 17 setiembre 2011 (UTC)

Como dixi, nun alcontrara nada (busqué poco, eso ye cierto) sobro esti tema, pero veo que yá ta discutíu. Nun tengo intención de facer una votación si yá enantes hubo otra sobro lo mesmo. Gracies pol avisu y la información.--Etienfr 22:40, 17 setiembre 2011 (UTC)