70 Pine Street

De Uiquipedia
Saltar a: navegación, buscar
70 Pine Street

70 Pine Street (conocíu enantes como American International Building) ye un rascacielos de la ciudá estaunidense de Nueva York. Asítiase nel númberu 70 de la cai Pine (70 Pine Street), ente les cais Cedar (Cedar Street) y Pearl (Pearl Street). Tien un altor de 290 m (952 pies) y 66 pisos.

Foi construyíu en 1932, por encargu del magnate del petróleu y el gas Henry Latham Doherty, pola compañía constructora Cities Service Company. El so cumal, con una torre con chapiteles d'estilu góticu, ye típica de los años 30 del sieglu XX, una dómina de gran desarrollu d'esti tipu d'arquitectura na ciudá y de gran competencia por ver quién facía l'edificiu más altu. Cuando acabó de construyise l'edificiu yera'l terceru más altu del mundu, per detrás namái que del Empire State Building y el Chrysler Building. Foi, amás, l'últimu rascacielos construyíu nel Lower Manhattan anantes de la Segunda Guerra Mundial, y el más altu de la zona hasta que se construyó'l World Trade Center.

L'edificiu llamose primero Cities Service Building, una y bones yera propiedá de la Cities Service Company. Cuando esta empresa llevó la so sé a la ciudá de Tulsa (Oklahoma) vendió-yla a la compañía de seguros American International Group (AIG). Los problemes financieros d'esta compañía obligáronla a vendelu a la compañía Youngwoo & Associates in 2009. Esta planea alquilar los pisos baxos pa oficines y convertir les plantes superiores n'apartamentos de luxu. L'edificiu tien protección, tanto de les sos fachaes como del interior (New York City Landmark[1], y New York Interior Landmark[2]), dende xunu de 2011. Dende la venta a los nuevos propietarios el nome oficial del edificiu ye 70 Pine Street, pero ye tovía ampliamente conocíu como American International Building.

Vista del edificiu dende'l 14 Wall Street

La so estructura ye d'aceru, y la so fachada ye de plaques de piedra caliza. Tien un espaciu útil de 80.360 m². La so torre, de piedra caliza recubierta, recuerda una montaña col cumal neváu. Nella, nel pisu 66, hai un observatoriu acristaláu que ufre les meyores vistes posibles del Lower Manhattan. L'observatoriu, anantes abiertu al públicu, quedó dempués pal esfrute esclusivu de los trabayadores del edificiu. Otra peculiaridá del edificiu ye que foi diseñáu con ascensores de dos pisos, que xubíen xente a dos plantes a la vez, pa intentar facer más rápidu l'accesu de los trabayadores nesta torre, bastante estrencha y con pocos ascensores. L'inventu duró poco tiempu, sicasí, porque foi mui criticáu polos sos usuarios. Pesie a ello, los constructores del Citigroup Center volvieron a usar esi sistema nos años 70.

Enllaces esternos[editar | editar la fonte]


Referencies[editar | editar la fonte]

  1. Postal, Matthew A. (21 de xunu de 2011). «Cities Service Building» (PDF). Documentu de declaración del edificiu como New York City Landmark. Landmarks Preservation Commission. Consultáu'l 30 de mayu de 2013.
  2. Postal, Matthew A. (21 de xunu de 2011). «Cities Service Building» (PDF). Documentu de declaración del interior del edificiu como New York City Interior Landmark. Landmarks Preservation Commission. Consultáu'l 30 de mayu de 2013.